د فرانسې اپوزيسيون گوندونو په افغانستان کې د فرانسوي ځواکونو په شتون کلکه نيوکه کړې او د دغه هېواد له ولسمشر نيکولا سرکوزي نه يې په ټينگه غوښتي چې په بيړه له افغانستان نه د فرانسوي سرتېرو ايستل پيل کړي، د فرانسې د کمونيست گوند وياند ((پاتريس بسکاد)) ويلي : فرانسه بايد ښکيلاکي پاليسۍ ته د پاى ټکې کيږدي او په افغانانو په تپل شوې او ناکامه جگړه کې د امريکا له غلامۍ او پيروۍ سره وداع وکړي، بسکاد په څرگندو ټکو کې وويل، په افغانستان کې د امريکا په مشرۍ د ناټو او ايتلاف هېوادونو د افغان مجاهدينو په وړاندې ماتې خوړلې، او دغه بې موجبه جگړه په فرانسه کې د ولس د اندېښنې او په افغانستان کې د گډوډيو او ناامنيو رامنځته کولو باعث گرځيدلې ده. ځکه نو فرانسوي پوځونه بايد په چټکۍ سره دغه هېواد پريږدي.
د فرانسې د ولسمشرۍ لپاره کانديد ((ژان لوک ميلانشون)) ويلي : په افغان ولس باندې تپل شوې جگړه د امريکا او د امريکايي گټو جگړه ده چې په فرانسې او فرانسوي ځواکونوپورې هيڅ اړه نه لري، ميلانشون په ټينگه له ولسمشر سرکوزي څخه وغوښتل چې د افغانانو له قهر او وژنو څخه نور د فرانسوي عسکرو د بچ کولو او همداراز د فرانسې هېواد د عزت او آبرو د خوندي ساتلو لپاره بايد ډېر ژر فرانسوي پوځونه له افغانستان څخه راوباسي، د فرانسې له حکومت او نيکولا سرکوزي څخه د سياستوالو او ولسي وگړو دا غوښتنې په داسې حال کې په جدي توگه رابرسېره کيږي چې د تېرې جمعې په ورځ يوه غازي افغان عسکر عبدالصبور د امريکايي عسکرو لخوا د افغانانو مړو ته د سپکاوي په غچ کې څلور فرانسوي سرتيري په هلاکت ورسول او ١٧ نور يې مرگوني ژوبل کړل.
له افغانستان نه د فرانسوي او نورو متحدينو لخوا د چټک، د امريکا له پروگرامه پرته او له وخت نه مخکې د خپلو ځواکونو د ايستلو له ويرې امريکا د غونډو جوړولو توطيې په لاره اچولي، غواړي په دې وسيله د خپلو صليبي متحدينو توجه بل لوري ته واړوي!!
په ناټو کې د امريکا استازي ايفوډلر ويلي چې په افغانستان کې د ناټو ځواکونو د راتلونکې په اړه د مئ په مياشت کې په شيکاگو کې د ناټو سرمشريزه جوړيږي، د ايفوډلر په وينا تر دې سمدستي وروسته به د ترکيې په استانپول ښار کې په دې اړوند د سيمې د بهرنيو چارو د وزيرانو غونډه جوړه شي!!
خو دا غونډې نه امريکا ته کومه گټه رسولې شي  او نه د امريکا په متحدينو اغېز ښندلى شي، د امريکا متحدين په دې پوهيدلي چې د دوى ځواکونه د امريکايي اهدافو او په افغانستان کې د افغان مجاهدينو په وړاندې د يوې ماتې خوړلې جگړې قرباني کيږي او بايد له افغانستان نه وايستل شي!
د فرانسې حکومت دا ځواک نه لري چې د فرانسوي ولس او د اپوزيسيون د سياستوالو د غوښتنو په خلاف په افغانستان کې د خپل پوځي حضور پرېکړه وکړي. د فرانسوي ځواکونو د ايستلو پرېکړه به هغه اعلان وي چې تر مخه به يې د ناټو او ايتلاف نور متحدين وار په وار د خپلو ځواکونو په ايستلو پېل وکړي او دا به په هر ډگر کې د امريکا د يوې بلې شرميدلې ماتې بېلگه وي!!